Dhimbja gjatë lindjes: nga frymëmarrja te epidurali

Çdo lindje dhemb ndryshe, dhe çdo grua e përjeton dhimbjen ndryshe. Nuk ka zgjedhje “më të mirë” ose “më të fortë”: ka zgjedhjen që ju përshtatet juve, atë ditë. Mund të ndërroni mendje edhe gjatë lindjes.

Pa ilaçe

• Lëvizja dhe pozicioni. Ecja, lëkundja, qëndrimi në këmbë ose në gjunjë shpesh e lehtësojnë dhimbjen më shumë se shtrirja në shpinë.
• Frymëmarrja. Frymëmarrja e ngadaltë dhe e thellë gjatë kontraksionit ju ndihmon të mos tendoseni. Mësojeni para lindjes.
• Masazhi. Shtypja në pjesën e poshtme të shpinës ndihmon shumë gra.
• Uji i ngrohtë. Një dush ose vaskë e ngrohtë relakson trupin, sidomos në fazën e hershme.
• Shoqëruesi. Një person i besuar pranë jush e ul ankthin. Pyesni maternitetin që më parë a lejohet shoqëruesi në sallë.

Me ilaçe

Injeksionet kundër dhimbjes. Bëhen në muskul, veprojnë pas rreth 20 minutash dhe zgjasin 2 deri në 4 orë. Mund t’ju bëjnë të përzier ose të përgjumur. Nëse bëhen shumë afër lindjes, mund të ndikojnë në frymëmarrjen e bebes dhe në ushqyerjen e parë, prandaj nuk jepen kur lindja është shumë afër.

Gazi me oksigjen. Në disa maternitete ofrohet një përzierje gazi që e thithni vetë nga një maskë. Nuk e heq dhimbjen plotësisht, por e zbut. Mund t’ju merren pak mendtë.

Epidurali. Anestezisti fut një tub shumë të hollë në shpinë, ku jep ilaç që mpin dhimbjen e lindjes. Në shumicën e rasteve e heq dhimbjen plotësisht.

Çfarë duhet të dini për epiduralin

• Këmbët mund t’i ndjeni të rënda dhe ndoshta nuk do të mund të ecni.
• Mund t’ju duhet një tub për urinën, sepse nuk e ndjeni fshikëzën.
• Faza e shtytjes mund të zgjasë më shumë, dhe kjo rrit pak gjasat që mjeku të ndihmojë me vakum ose pincë.
• Rrallë ul tensionin, dhe rreth 1 në 100 gra kanë dhimbje koke pas tij.

“Epidurali të lë me dhimbje shpine për gjithë jetën.” Këtë e dëgjojnë shumë gra. Dhimbja e shpinës pas lindjes është e shpeshtë te të gjitha nënat, me ose pa epidural, sepse vjen nga shtatzënia dhe nga mbajtja e bebes. Vendi i injeksionit mund të dhembë pak për disa ditë.

“Lindja me epidural nuk është lindje e vërtetë.” Nuk ka lindje më të vërtetë se një tjetër. Ka vetëm lindje ku nëna u ndie e dëgjuar.

Pyetjet për maternitetin, para lindjes

Jo të gjitha maternitetet ofrojnë të gjitha mënyrat, dhe në disa raste epidurali kërkon anestezist të lirë ose ka kosto. Pyesni që më parë:

• a ofrohet epidurali, në çdo orë, dhe a ka kosto
• a ka vaskë ose dush në sallën e lindjes
• a lejohet shoqëruesi
• a mund të lëvizni lirshëm gjatë lindjes

Përgjigjet ju ndihmojnë të bëni një plan, dhe ta ndryshoni pa stres nëse duhet. Lexoni më shumë te fazat e lindjes.

Burime të konsultuara

• NHS: Pain relief in labour

Ky artikull është shkruar nga redaksia e mam.al dhe jep informacion të përgjithshëm. Nuk zëvendëson këshillën e mjekut, të anestezistit ose të mamisë. Përmban informacion të sektorit publik të licencuar sipas Open Government Licence v3.0.