Të përzierat në shtatzëni

Të përzierat dhe të vjellat janë nga shqetësimet më të zakonshme të shtatzënisë. Fillojnë zakonisht midis javës së 4-t dhe 7-të dhe për shumicën e grave qetësohen nga java e 16-të deri në 20-të. Nuk ka të dhëna që të përzierat e zakonshme e dëmtojnë bebin.

Edhe pse u thonë “të përzierat e mëngjesit”, mund të vijnë në çdo orë të ditës ose të natës. Shpesh janë më të forta kur sapo zgjoheni.

Pse ndodhin

Shkaku i saktë nuk dihet. Mendohet se lidhen me ndryshimet hormonale të 12 javëve të para.

Çfarë mund të ndihmojë

• Hani pak e shpesh, rreth 6 vakte të vogla në ditë, në vend të 3 vakteve të mëdha.
• Mbani diçka për të ngrënë pranë krevatit, si një biskotë të thatë, dhe hani pak para se të ngriheni.
• Zgjidhni ushqime të thjeshta: bukë të thekur, makarona, patate të ziera, biskota të thjeshta.
• Pini shpesh nga pak ujë gjatë ditës. Ushqimet dhe pijet e ftohta shpesh tolerohen më lehtë.
• Provoni xhenxhefilin, për shembull në çaj ose në biskota. Pyesni farmacistin para se të merrni suplemente me xhenxhefil.
• Shmangni aromat dhe ushqimet që ju shkaktojnë të përziera.
• Pushoni sa më shumë. Lodhja i shton të përzierat.
• Disa gra ndihen më mirë me byzylykët e akupresurës që përdoren për të përzierat në udhëtim.

Nëse këto nuk mjaftojnë, mjeku mund t’ju japë një ilaç të sigurt për shtatzëninë. Mos merrni ilaçe kundër të vjellave pa folur me mjekun.

Kur të përzierat janë shumë të forta

Disa gra kanë të vjella aq të forta sa nuk mbajnë dot as ushqim, as ujë. Kjo quhet hiperemezë gravidike. Mund të sjellë dehidratim dhe mungesë të lëndëve ushqyese, dhe ka nevojë për trajtim mjekësor, ndonjëherë në spital. Nuk është faji juaj dhe nuk duhet ta duroni në heshtje.

Kur të telefononi mjekun

Kontaktoni mjekun nëse villni dhe:

• urina është shumë e errët, ose nuk keni urinuar për më shumë se 8 orë
• nuk mbani dot ushqim ose ujë për 24 orë
• ndiheni shumë e dobët, ju merren mendtë ose ju bie të fikët kur ngriheni
• keni dhimbje barku
• keni temperaturë të lartë
• villni gjak
• po humbni peshë

Burime të konsultuara

• NHS: Morning sickness
• NHS: Vomiting and morning sickness

Ky artikull është shkruar nga redaksia e mam.al dhe jep informacion të përgjithshëm. Nuk zëvendëson këshillën e mjekut ose të mamisë. Përmban informacion të sektorit publik të licencuar sipas Open Government Licence v3.0.