Shenjat e para të shtatzënisë

Shenja më e zakonshme është vonesa e menstruacioneve. Shumë gra vënë re edhe lodhje të madhe, gjinj të ndjeshëm, të përziera ose nevojë për të urinuar më shpesh. Këto shenja shfaqen zakonisht rreth javës së 4-t deri në 6-të të shtatzënisë, por jo çdo grua i ka të gjitha, dhe çdo shtatzëni është ndryshe.

E vetmja mënyrë për ta ditur me siguri është një test shtatzënie.

Shenjat më të zakonshme

Vonesa e menstruacioneve

Nëse cikli juaj është i rregullt dhe menstruacionet nuk vijnë në kohë, kjo është shpesh shenja e parë. Nëse cikli juaj është i parregullt, mund ta vini re më vonë.

Një gjakderdhje shumë e lehtë

Disa gra kanë njolla ose pak gjak rreth ditës kur prisnin menstruacionet. Quhet gjakderdhje implantimi dhe është shumë më e lehtë se një cikël i zakonshëm.

Të përzierat dhe të vjellat

Edhe pse u thonë “të përzierat e mëngjesit”, mund të vijnë në çdo orë të ditës ose të natës. Zakonisht fillojnë midis javës së 4-t dhe 7-të. Më shumë për to lexoni te të përzierat në shtatzëni.

Lodhja

Mund të ndiheni shumë e lodhur edhe pas një dite të zakonshme. Kjo lodhje është e shpeshtë në javët e para.

Gjinjtë e ndjeshëm

Gjinjtë mund të fryhen, të rëndohen ose të dhembin, ngjashëm me ditët para menstruacioneve.

Urinimi më i shpeshtë

Mund t’ju duhet të shkoni më shpesh në tualet, edhe natën, pa dhimbje ose djegie.

Ndryshime të tjera

• kapsllëk
• më shumë sekrecione vaginale, pa kruajtje ose acarim
• shije metalike në gojë
• ndjeshmëri ndaj disa aromave
• dëshirë për ushqime të reja, ose neveri për ushqime që ju pëlqenin
• ndryshime të humorit

Kur ta bëni testin

Testet e shtatzënisë shiten në barnatore dhe nuk kërkojnë recetë. Shumica japin një rezultat të besueshëm nga dita e parë e vonesës së menstruacioneve. Nëse testi del negativ, por menstruacionet ende nuk vijnë, përsëriteni pas disa ditësh.

Nëse testi është pozitiv

• Lini një takim me mjekun gjinekolog ose me mjekun e familjes. Shihni çfarë ndodh në vizitat e para.
• Nëse nuk e merrni ende, pyesni mjekun ose farmacistin për acidin folik, që merret çdo ditë deri në javën e 12-të.
• Lini alkoolin dhe duhanin, dhe njihuni me ushqimet që duhen shmangur.
• Nëse shtatzënia nuk ishte e planifikuar, ose nuk jeni e sigurt si ndiheni, flisni me mjekun. Mund t’ju ndihmojë të shihni mundësitë që keni.

Kur të kërkoni ndihmë

Shumica e shenjave të hershme janë normale dhe nuk kanë pse t’ju shqetësojnë. Kontaktoni mjekun menjëherë, ose shkoni në urgjencë, nëse keni:

• gjakderdhje vaginale
• dhimbje barku
• dhimbje në legen

Mund të kërkoni ndihmë në çdo kohë nëse jeni e shqetësuar për shëndetin tuaj ose të bebes.

Burime të konsultuara

• NHS: Signs and symptoms of pregnancy

Ky artikull është shkruar nga redaksia e mam.al dhe jep informacion të përgjithshëm. Nuk zëvendëson këshillën e mjekut ose të mamisë. Përmban informacion të sektorit publik të licencuar sipas Open Government Licence v3.0.