Kalo te përmbajtja
mam.al
Bebja

Temperatura te bebja: kur të shqetësoheni

Si ta matni temperaturën, çfarë të bëni në shtëpi, pse kompresat me uthull ose alkool nuk këshillohen dhe kur duhet të shkoni menjëherë te mjeku.

4 min lexim

Në këtë artikull

Temperatura 38°C ose më shumë quhet temperaturë e lartë. Te fëmijët më të rritur shpesh kalon vetë brenda 1 deri në 4 ditësh. Te bebet e vogla, mosha ka rëndësi të madhe:

  • nën 3 muaj, me 38°C ose më shumë: shkoni te mjeku menjëherë, edhe nëse bebja duket mirë
  • 3 deri në 6 muaj, me 39°C ose më shumë: shkoni te mjeku menjëherë

Si ta matni

Përdorni një termometër dixhital nën sqetull: vendoseni lart në sqetull, mbajeni krahun e bebes butësisht pas trupit dhe prisni sinjalin. Prisni disa minuta pas banjës ose pasi bebja ka qenë e mbështjellë mirë, sepse të dyja e rrisin përkohësisht temperaturën. Termometrat me merkur mos i përdorni: po u thyen, janë të rrezikshëm.

Në shtëpi

  1. 1

    Lëngje shpesh

    Jepini gji ose biberon më shpesh. Bebet më të mëdha mund të pinë edhe ujë.

  2. 2

    As ta zhvishni, as ta mbështillni

    Vishni bebin me rroba të lehta dhe mbulojeni me një çarçaf të hollë. Mbështjellja me batanije e rrit temperaturën.

  3. 3

    Kontrollojeni shpesh

    Edhe natën. Shikoni si sillet, a pi, a lag pelenat.

  4. 4

    Ilaçet vetëm me këshillë

    Paracetamoli ose ibuprofeni jepen vetëm nëse bebja është e shqetësuar, sipas moshës dhe peshës, si ju thotë pediatri ose farmacisti. Te bebet shumë të vogla nuk jepen pa mjek.

Kompresat me uthull ose alkool

Në shumë familje temperatura ulet me kompresa me uthull, raki ose alkool. Te bebet kjo nuk këshillohet. Alkooli mund të thithet nga lëkura dhe të helmojë bebin. Fërkimi me ujë të ftohtë e bën bebin të dridhet, dhe kjo e ngre temperaturën përsëri. Mos i jepni kurrë aspirinë një fëmije nën 16 vjeç.

Temperatura vetë nuk është sëmundja: është mënyra si trupi lufton infeksionin. Më shumë se numri në termometër, ka rëndësi si duket dhe si sillet bebja.

Shkoni te mjeku sot nëse bebja

  • është nën 3 muaj dhe ka 38°C ose më shumë
  • është 3 deri në 6 muaj dhe ka 39°C ose më shumë
  • ka temperaturë prej 5 ditësh ose më shumë
  • nuk do të hajë ose nuk duket si zakonisht
  • lag më pak pelena, ka sytë e futur ose qan pa lot
  • ka edhe një skuqje në lëkurë

Telefononi 127 ose shkoni në urgjencë nëse bebja

  • ka një skuqje që nuk zbehet kur shtypni mbi të një gotë qelqi
  • e ka të vështirë të marrë frymë: rënkon, i futen brinjët kur merr frymë ose merr frymë shumë shpejt
  • është shumë e përgjumur dhe zgjohet me vështirësi, ose nuk reagon si zakonisht
  • ka lëkurë ose buzë blu, gri, shumë të zbehta ose me njolla
  • ka qafën të ngurtë ose e shqetëson drita
  • ka konvulsione (dridhje që nuk ndalen), sidomos për herë të parë
  • ka duart dhe këmbët shumë të ftohta, ndërsa trupi është i nxehtë

Pyetje të shpeshta

Sa është temperatura e lartë te bebja?
38°C ose më shumë. Te një bebe nën 3 muaj, kjo kërkon vizitë te mjeku menjëherë.
A ta ul temperaturën me kompresa me uthull ose alkool?
Jo. Alkooli mund të thithet nga lëkura, dhe fërkimi me ujë të ftohtë e bën bebin të dridhet. Vishni bebin lehtë dhe jepini lëngje.
Si e bëj testin e gotës?
Shtypni anën e një gote qelqi mbi skuqje. Nëse njollat duken ende përmes qelqit, telefononi 127 menjëherë.

Burime të konsultuara

Ky artikull është shkruar nga redaksia e mam.al dhe jep informacion të përgjithshëm. Nuk zëvendëson këshillën e mjekut ose të pediatrit. Përmban informacion të sektorit publik të licencuar sipas Open Government Licence v3.0.

Ndani WhatsApp Facebook Viber

Vazhdoni të lexoni