Shenjat e lindjes: si ta kuptoni që lindja po fillon

Shenjat kryesore që lindja po fillon janë kontraksionet e rregullta, që bëhen gjithnjë më të forta dhe më të shpeshta, dhe plasja e ujërave. Mund të keni edhe dhimbje në fund të shpinës ose të shihni një lëng ngjitës rozë. Kontaktoni mjekun ose maternitetin kur mendoni se lindja ka filluar, ose kur keni kontraksione çdo 5 minuta a më shpesh.

Shenjat që lindja po fillon

Kontraksionet

Barku shtrëngohet dhe pastaj çlirohet. Në fillim mund të ngjajnë me dhimbjet e menstruacioneve. Me kalimin e kohës bëhen më të gjata, më të forta dhe më të shpeshta.

Në muajt e fundit mund të keni edhe shtrëngime pa dhimbje ose me pak dhimbje, që vijnë e shkojnë pa rregull. Këto janë kontraksione “prove” dhe zakonisht qetësohen kur pushoni ose ndërroni pozicion. Kontraksionet e lindjes nuk qetësohen.

Tapa e mukusit

Një lëng ngjitës, si pelte, rozë ose me pak gjak, që del i gjithi njëherësh ose copa-copa. Mund të dalë disa ditë para lindjes ose gjatë saj.

Plasja e ujërave

Mund të jetë një rrjedhje e ngadaltë ose një derdhje e papritur. Vendosni një pecetë, jo tampon, dhe kontaktoni maternitetin.

Shenja të tjera

• dhimbje ose rëndesë në fund të shpinës
• nevojë për të shkuar në tualet, sepse koka e bebes shtyp zorrët

Faza e hershme e lindjes

Në fillim, qafa e mitrës zbutet, hollohet dhe fillon të hapet. Kjo mund të zgjasë orë, ndonjëherë edhe ditë, sidomos në lindjen e parë. Shpesh ju këshillojnë ta kaloni këtë fazë në shtëpi: pushoni, pini ujë, hani diçka të lehtë dhe lëvizni nëse ju ndihmon.

Kur të kontaktoni mjekun ose maternitetin

• kur mendoni se lindja ka filluar
• kur kontraksionet vijnë çdo 5 minuta ose më shpesh
• kur nuk jeni e sigurt ose jeni e shqetësuar për diçka

Kontaktoni menjëherë, edhe natën, nëse

• ju plasin ujërat
• keni gjakderdhje vaginale
• bebja lëviz më pak se zakonisht
• jeni më pak se 37 javë shtatzënë dhe mendoni se mund të keni filluar lindjen
• një kontraksion zgjat më shumë se 2 minuta
• keni 6 ose më shumë kontraksione në 10 minuta

Nëse mendoni se bebja po vjen tani dhe keni nevojë të fortë për të shtyrë, telefononi urgjencën në 127.

Pasi ju plasin ujërat

Tregojini mjekut menjëherë nëse lëngu ka erë të keqe, ka ngjyrë të gjelbër ose kafe, ose nëse ka gjak. Zakonisht lindja fillon brenda 24 orëve. Nëse nuk fillon, mund t’ju këshillojnë ta nxisin lindjen, sepse rreziku i infeksionit rritet pak.

Ndërsa prisni, matni temperaturën çdo 4 orë kur jeni zgjuar, dhe tregojini mjekut nëse kalon 37,5°C ose nëse bebja lëviz më pak.

Burime të konsultuara

• NHS: Signs that labour has begun
• NHS: Preparing for labour and birth

Ky artikull është shkruar nga redaksia e mam.al dhe jep informacion të përgjithshëm. Nuk zëvendëson këshillën e mjekut ose të mamisë. Përmban informacion të sektorit publik të licencuar sipas Open Government Licence v3.0.