Dhimbjet gjatë gjidhënies: thithat, gjinjtë e mbushur dhe mastiti

Gjidhënia mund të jetë e pakëndshme në ditët e para, por dhimbja që vazhdon në çdo ushqyerje nuk është diçka që duhet duruar. Shumicën e herëve shkaku është i thjeshtë dhe zgjidhet me pak ndihmë.

Thithat e plagosura

Shkaku më i shpeshtë është mënyra si kapet bebja në gji. Kur bebja merr vetëm thithin, ai shtypet në qiellzë dhe plagoset. Pas ushqyerjes thithi del i shtypur, i pjerrët ose i bardhë, dhe bebja shpesh mbetet e pakënaqur.

• Kërkoni që një mami ose këshilluese gjidhënieje t’ju shohë teksa ushqeni. Pa rregulluar kapjen, asnjë krem nuk e zgjidh problemin.
• Ndërroni pecetat e gjirit në çdo ushqyerje dhe mbani sytjena pa tel, që nuk shtrëngojnë.
• Pas ushqyerjes, lyeni thithin me pak nga qumështi juaj dhe lëreni të thahet.
• Mbrojtëset e thithave përdorini vetëm me këshillë, sepse mund ta prishin kapjen.

Si duket një kapje e mirë e shpjegojmë te fillimi i gjidhënies.

Gjinjtë shumë të mbushur

Gjinjtë ndihen të fortë, të tendosur dhe dhembin, dhe thithi mund të rrafshohet aq sa bebja kapet me vështirësi.

• Ushqeni shpesh.
• Para ushqyerjes, një peshqir i ngrohtë ose një dush i ngrohtë e ndihmon qumështin të rrjedhë.
• Nxirrni me dorë vetëm aq qumësht sa të lehtësoheni. Nëse nxirrni më shumë, gjiri prodhon më shumë.
• Mes ushqyerjeve, një kompresë e ftohtë e qetëson dhimbjen.

Një gungë e vogël që dhemb

Zakonisht është një kanal qumështi i bllokuar. Vazhdoni të ushqeni nga ai gji, masazhojeni butësisht gungën drejt thithit gjatë ushqyerjes dhe shmangni rrobat e ngushta. Mos e lini pa trajtuar, sepse mund të kthehet në mastit.

Mastiti

Mastiti është inflamacion i gjirit, zakonisht nga qumështi që grumbullohet. Shenjat janë:

• një zonë e ënjtur, e nxehtë dhe që dhemb në një gji, ndonjëherë e skuqur (në lëkurë të errët skuqja duket më pak)
• një gungë ose zonë e fortë
• dhimbje që djeg, gjatë gjithë kohës ose vetëm gjatë ushqyerjes
• ndjesi si në grip: dhimbje trupi, temperaturë, të dridhura, lodhje

“Më ka zënë të ftohtë gjiri”

Shpesh dhimbja e gjirit shpjegohet në familje me të ftohtin ose rrymën e ajrit, dhe këshillohen kompresa me raki ose alkool. Mastiti nuk vjen nga i ftohti: vjen kryesisht nga qumështi që nuk del mirë, nga thithat e plagosura ose nga rrobat që shtrëngojnë. Alkooli mbi gji e irriton lëkurën dhe nuk duhet të arrijë te bebja. Ajo që ndihmon vërtet është ushqyerja e shpeshtë dhe ndihma për kapjen.

Kur të shkoni te mjeku

• nëse nuk ndiheni më mirë 12 deri në 24 orë pasi keni nisur këto masa
• nëse në ndonjë moment ndiheni më keq
• nëse keni temperaturë të lartë ose ndiheni shumë keq
• nëse dhimbja e thithit ose e gjirit nuk ikën

Mjeku mund t’ju japë antibiotik. Shumë pak prej tij kalon në qumësht dhe nuk është rrezik për bebin, ndonëse mund ta bëjë pak më të shqetësuar. Gjidhënia vazhdon.

Burime të konsultuara

• NHS: Sore or cracked nipples when breastfeeding
• NHS: Breast pain and breastfeeding
• NHS: Mastitis

Ky artikull është shkruar nga redaksia e mam.al dhe jep informacion të përgjithshëm. Nuk zëvendëson këshillën e mjekut ose të mamisë. Përmban informacion të sektorit publik të licencuar sipas Open Government Licence v3.0.