Shenjat e rrezikut në shtatzëni dhe pas lindjes

Shumica e shqetësimeve të shtatzënisë janë të zakonshme dhe kalojnë. Disa shenja, megjithatë, duan kujdes mjekësor sot, jo në vizitën e radhës. Shpesh gratë hezitojnë: “ndoshta është normale”, “nuk dua ta shqetësoj mjekun”, “në shtatzëni dhemb gjithçka”. Nëse diçka ju duket e gabuar, telefononi. Një kontroll që del mirë nuk është kohë e humbur.

Shenjat më poshtë vlejnë gjatë shtatzënisë dhe deri në një vit pas lindjes, jo vetëm në 40 ditët e lehonisë.

Kërkoni ndihmë mjekësore menjëherë nëse keni

Koka dhe sytë

• dhimbje koke që nuk ikën ose që përkeqësohet
• marrje mendsh ose të fikët
• ndryshime në shikim: shikim të turbullt, drita që shkëlqejnë ose njolla para syve

Gjoksi dhe frymëmarrja

• dhimbje në gjoks ose zemër që rreh shumë shpejt
• vështirësi në frymëmarrje

Barku dhe trupi

• dhimbje të fortë barku që nuk ikën
• të përziera dhe të vjella të forta
• temperaturë 38°C ose më shumë
• ënjtje të madhe të fytyrës ose të duarve
• ënjtje, skuqje ose dhimbje në një këmbë ose krah, sidomos deri në 6 javë pas lindjes
• lodhje të jashtëzakonshme, që nuk ngjan me lodhjen e zakonshme

Gjakderdhja

• gjakderdhje ose rrjedhje lëngu nga vagina gjatë shtatzënisë
• gjakderdhje të madhe ose rrjedhje me erë të keqe pas lindjes

Bebja dhe mendja

• bebja lëviz më pak ose ka ndaluar së lëvizuri, gjatë shtatzënisë
• mendime për të dëmtuar veten ose bebin

Nëse keni dhimbje gjoksi, nuk merrni dot frymë, keni konvulsione ose humbni ndjenjat, telefononi 127.

Preeklampsia

Disa nga këto shenja mund të jenë preeklampsi: tension i lartë që shfaqet zakonisht pas javës së 20-të, por që mund të nisë edhe në ditët ose javët pas lindjes. Shenjat e para, tensioni i lartë dhe proteina në urinë, nuk ndihen. Prandaj në çdo vizitë ju matin tensionin dhe ju kontrollojnë urinën, dhe prandaj këto vizita nuk duhen anashkaluar.

Shenjat që mund t’i vini re vetë janë: dhimbje e fortë koke që nuk ikën me qetësuesit e zakonshëm, shikim i turbullt ose drita që shkëlqejnë, dhimbje poshtë brinjëve, ënjtje e papritur e fytyrës, duarve ose këmbëve, urth që nuk kalon me ilaç dhe të vjella. Nëse i keni, kontaktoni mjekun ose maternitetin po atë ditë.

Si ta thoni kur telefononi

Thoni që në fjalinë e parë se jeni shtatzënë, ose kur keni lindur: “Jam 32 javë shtatzënë” ose “Kam lindur para tre javësh”. Pastaj tregoni shenjën, kur filloi dhe a po përkeqësohet. Pas lindjes, shumë shenja ngatërrohen me lodhjen e zakonshme nëse mjeku nuk e di që keni lindur së fundi.

Mbani gati

• numrin e gjinekologut tuaj dhe të maternitetit ku do të lindni ose ku keni lindur
• kartelën e shtatzënisë dhe rezultatet e analizave të fundit
• listën e ilaçeve që merrni

Për ndjenjat e trishtimit dhe ankthit pas lindjes lexoni te depresioni pas lindjes, dhe për javët e para pas lindjes te rikuperimi pas lindjes.

Burime të konsultuara

• CDC: Urgent maternal warning signs
• NHS: Pre-eclampsia

Ky artikull është shkruar nga redaksia e mam.al dhe jep informacion të përgjithshëm. Nuk zëvendëson këshillën e mjekut ose të mamisë. Përmban informacion të sektorit publik të licencuar sipas Open Government Licence v3.0.